Ўзбекистон Республикасидаги алоҳида эҳтиёжли болалар учун инклюзив таълим

14 апрелда Наманган шаҳар № 68-сонли болалар боғчаси ташаббуси билан шаҳардаги мактабгача таълим муассасаларининг раҳбарлари, шунингдек, болалар боғчасининг ҳамкорлари учун байрам тадбири уюштирилди.

Ушбу болалар боғчасига юздан ортиқ бола ташриф буюриб, шулардан 13 таси алоҳида таълимий эҳтиёжга муҳтож болалардир. Малика Дадабоеванинг сўзларига қараганда, инклюзив гуруҳ деб ҳисобланган гуруҳдаги алоҳида эҳтиёжга муҳтож болалар ўз тенгдошлари қатори барча тўгаракларга қатнашишади.

Унинг гуруҳидаги тўгаракдаги машғулот 20 дақиқа давом этиб, агар машғулотлар пайтида болажонлар янги материални ўзлаштиришда қийинчилик сезишса, тўгарак раҳбари чошгоҳдаги толма чойдан сўнг улар билан яна, қайта шуғулланади.

Тадбирда болажонлар инглиз ва рус тиллари, спорт тўгаракларида эришган мувафаққиятларини ташриф буюрганларга намойиш қилишди. Шунингдек, «Зумрадойлар даврасида» тўгарагининг аъзолари ҳақиқий хамир қориб, ундан кулча нон ясашди. (Ўзингизга маълум, Зумрад «Зумрад ва Қиммат» эртагининг бош қаҳрамони бўлиб, оқила, доно, меҳнатсевар қиз).

Бошқа тўгарак аъзолари эса бу пайт рус тилида шеър ўқишиб, инглиз тилида қўшиқ куйлашди.
Шундан сўнг тадбир иштирокчилари кун тартибидаги дастурга биноан тажриба ва фикр алмашишди. Маҳалла қўмитаси, вилоят ва шаҳар халқ таълими Бошқармасининг вакиллари уч томонлама – «маҳалла-оила-боғча» алоқасининг муҳим жиҳатлари ҳақида тўхталишди.

Ўзаро бу ҳамкорлик боланинг ижтимоий мослашуви ҳамда ҳар тарафлама ривожланишига самарали ёрдам беришига доир жуда кўп ижобий мисоллар келтиришди. Шаҳар Халқ таълими бўлими Бош бошқармаси вакили Зуҳра Аббосова, яқинда мактабгача таълим муассасасининг тарбияланувчилари ўртасида ўтказилган шахмат мусобақаси ҳақида маълумот бериб, унинг иштирокчилари фахрий ёрлиқ ҳамда эсдалик совғалари билан тақдирланганлигини эслатиб ўтди.

Иштирокчилар № 68-сонли болалар боғчасининг мудираси Саида Сайдуллаевага ушбу муҳим тадбирни ташкил қилиш ва ўтказишда кўрсатган ташаббуси учун ўз ташаккурларини айтишди. (Бизга тақдим этилган маълумотлар учун М.Муҳсинбоевага ўз миннатдорчилигимизни билдирамиз)